fleire funn i full fart

Trass i at natta var godt i gang då eg la meg i går, var det slett ingen kunst å starte dagen klokka sju i dag. Eg tok meg god tid til frukostinntak og nistelaging, og våga til og med å gjere ein innsats i klesvegen. 

Kjolen er det nyaste tilskotet til garderoba mi, trur eg. På lappen står det "Norlyn au Finland", og i likskap med kåpa er kjolen funnen på loftet heime. Og kåpa er eit kapittel for seg sjølv. Den vart henta ned for om lag seks år sidan, men har berre blitt hengande i påvente av nye knappar og friskt mot frå mi side. I dag bestemte eg endeleg at det var på tide å få den ut i verda. Utan knappar. Dei får kome ein annan dag! Kåpa kjem forresten frå Møre Konfeksjonsfabrikk ein gong på seksti- eller syttitalet.

(Sko frå H&M, veske frå Primark, hårfrisyre frå eit halvt år utan frisør.)


Etter kvart kom eg meg av garde. På Tåsen skole møtte eg Marianne, og starta dagens loppisrunde med eit forsiktig solbrillekjøp.

Det var enno ikkje folk over alt, så for ein gongs skuld gjekk det an å gå nokonlunde fritt og greitt utan press frå alle kantar. Dermed vart vi kjapt ferdige, og turen gjekk vidare til Voksen skole. Der var utvalet overraskande bra, og eg klarte å få med meg to Figgjo Bekkeblom-tallerkar til mamma.

Men det enda ikkje der! Vi sprekingane drog vidare til Lysejordet skole så snart vi følte at vi hadde sett det som var verd å sjå på Voksen. På dette tidspunktet var føtene mine i full gong med å klage si naud, og eg angra bittert på at eg ikkje hadde teke med meg eit par flate sko. Eg er jo heilt ute av trening! 

Lysejordet hadde vi store forventingar til, og trass i at det var seint på dag då vi kom fram, vart vi begge nøgde med utvalet der. Kanskje er det ikkje så vanskeleg å bli positivt overraska når ein ikkje leitar etter heilt spesifikke ting, men noko av det eg likar best er jo å finne slikt som eg hadde gløymt at eg trengde. Slik som bunadsko.

Veldig billige, svært lite brukt, og kjempegode å gå i. Eg ser med glede fram til ein maimånad utan gleppesko! 

Heilt til slutt fekk denne skåla vere med meg heim.

No skal eg ete, kvile, dusje og undre meg over korleis eg skal klare å orke ei runde til i morgon. 

God helg!

loppedilla

Dette er heilt sikkert eit teikn på at eg er i ferd med å bli fullstendig ko-ko.

Dei to komande dagane er nemleg dei to største loppemarknadsdagane i heile året (her i Oslo), og for å få mest mogleg ut av tida, har eg merka av alle dei 24 skulane på kartet. Og så har eg hengt kartet opp over senga. Det kjendest eigentleg litt greitt å dekke over statistikknotata frå førre eksamen, men mest av alt føler eg meg teit som brukar så mykje tid på å bestemme meg for kva for loppisar eg skal satse på. Jaja, eg får då oversikt, om ikkje anna! 

Dagen i dag hadde mykje på lur til ei trøtt frøken (altså meg). Første forelesning vart droppa til fordel for noko heilt anna kjempeviktig, og det gav meg sjansen til å takke ja til kafélunsj ilag med herlege Sigrid. Etterpå var det tid for dag 2 med hundedisseksjon. Min absolutte undervisningsfavoritt! Det kan kanskje verke litt rart at det skal vere så kjekt å kutte i eit dødt dyr, men ein lærer fantastisk mykje av det. Dessutan gir det ein heilt spesiell type erfaring når ein får sjå og kjenne på noko fysisk, og ein sjølv må leite seg fram til dei rette strukturane i kroppen. Ein lærer med heile seg, i staden for å berre bruke auga, slik ein gjer når ein les ei bok. 

Hundedisseksjonen førte også med seg dagens store skuffelse.

Neeiii! KAMERAET mitt! 

Det dyre, vasstette og påstått støtsikre kompaktkameraet mitt, som har vore ein trufast følgjesvein i snart eit heilt år. Ein skulle tru det var perfekt for meg, som ofte er litt uvøren når det kjem til eigne ting (av ein eller annan grunn er eg stort sett veldig flink med det som tilhøyrer nokon andre). At det skulle gå så lang tid før eg faktisk mista det i bakken er eigentleg litt rart, men i dag hendte det. 

TRE meter skulle det liksom tole, men no ser det altså slik ut, og det datt berre to meter ned! Eg er skuffa, vonbroten og djupt såra, for dette er ein skikkeleg strek i rekninga. No må eg til Japan Photo (som alltid gir skikkeleg bra service, det skal seiast) for å klage, og dei kjem sikkert til å ville reparere eller gje meg eit nytt kamera som er heilt likt. Ikkje at det kostar meg noko, men no veit eg jo at kameraet ikkje toler så mykje som det skal, og då blir det veldig mykje meir irriterande at det er så tregt som det er. For det er skikkeleg tregt, og bileta blir berre sånn passe (når dei ikkje blir heilt elendige fordi utløysaren var for treg, vel å merke). 

Jess, klar for loppemarknad!

lukke

No for tida er det ingenting som er så fint som å vere heime i Nordfjord. Det er vår i lufta sjølv om snøen framleis gjer eit forsøk på å klamre seg fast, og med ujamne mellomrom sender florlette fnugg ned mot vedhoggande karar. 

Eg skal jo eigentleg halde meg i Oslo, men på torsdag måtte eg berre reise heim, for det passa så bra. Ei lita stemme i bakhovudet meinte at eg kasta vekk både tid og pengar, men då eg kom fram slo det meg at lamminga var godt i gang. Vips, så var alle bekymringar borte! 

Det starta heftig og hektisk med eit keisarsnitt. Ei ny og lærerik oppleving for mitt vedkomande, der eg plutseleg sat med to skjønne lam i fanget og ei livmor i handa medan Ylva snurpa og sydde saman og putta alt tilbake på plass (ikkje lamma, altså, dei fekk bli ute). 

Etter det gjekk det slag i slag. Mellom vanskelege trillingfødslar, hornklipping og mating av flaskelam, kunne eg nyte kaffi, sol og pensum på terrassen.

Det finst ingen stad som kan måle seg med Nordfjord på slike dagar. Små glimt av lukke snik seg inn i kvar einaste dag. Det er uvant og fantastisk, heilt utan sidestykke. Oslo, gå og legg deg!

I morgon blir ein stor og vanskeleg dag, men kanskje får eg vendepunktet eg treng akkurat no. Fingers crossed. 

påska

Fantastisk stemning heime på Øvrelid. Ser du hunden?

Karl Espen fekk seg 30 meter flytebrygge som måtte inspiserast i skikkeleg ruskevêr. Dei smadra naustdørene gapar framleis som eit minne om julestormen. 

Mille passa godt på at ingen datt i sjøen. 

I skyminga på oskeonsdag var storegrana klar for felling. 

Nydeleg utsikt!

Grana datt perfekt, men då var det blitt for mørkt for det stakkars kameraet mitt. 

På skjærtorsdag var heile familien invitert til påskelunsj på Hotell Alexandra. Morfar og Kirsti arrangerte ein kjempekoseleg dag for alle sine etterkomarar og deira familiar, så vi var ein god gjeng. Morfar har to barn med ektefellar, og ti barnebarn. Av barnebarna var eg den einaste som hadde med partner og (ste)barn, men det vart jo 17 personar likevel. Kirsti og gjengen var til saman 9 stk. Det er kjekt når alle samlast!

Ja, og så fekk vi bade, då. Herleg. 

Fjorårets hyttetur fekk si reprise på langfredag. Det var Jan Håvar, Åge Kristian, Kristen Per og eg, og denne gongen spelte vi politi og røvere heilt til vi var for fulle til å gidde meir. Akkurat som i fjor, var det eg som slukna først, og det var eg som vakna først neste morgon. Fyllesjuk. Veldig fyllesjuk. 

Eg veit at eg burde ha lært det no, men det er så sjeldan eg er med på skikkelege fyllekveldar. Nokre glas går fint, men på eitt eller anna punkt tippar det over, og då går det skikkeleg skeis. I går greidde eg å kave meg tilbake til parkeringsplassen, men resten av dagen gjekk med til å sove og kaste opp. Først i titida om kvelden byrja kroppen å bli grei att, og då angra eg skikkeleg. Eg tapte jo ein heil dag! Æsj ... 

I dag skal vi ete påskelam hjå mamma og pappa. Den siste heimedagen skal nytast.

hjort er hjort

Eg rakk ikkje eingong å køyre heim  frå flyplassen på fredag, før det vestlandske dyrelivet kom og trengde seg inn i tilveret (eller omvendt). I form av desse to, såklart:

Det er rart med det, korleis eg aldri nokon gong ser så få dyr som eg gjer når eg er på skulen i Oslo, der eg er for å lære om, ja nettopp, dyr. 

skulekvardag

Livet går vidare etter endå ein eksamen. Nemnde eg forresten at eg sto på den eg hadde i Februar? Det gjorde eg, i alle fall, sjølv om det ikkje akkurat var med god margin. Denne gongen (som var sist fredag) gjekk det litt betre. Kryssar fingrane for at magekjensla mi er til å stole på!

No er vi i gang med anatomi og fysiologi. Det er to enormt store fagområde, og det er sinnsjukt mykje å hugse på. Ein kan kvelast av mindre... 

Denne veka handlar det om rørsleapparatet og nervesystemet. Var det nokon som sa "mjuk start"? Her driv vi for all del ikkje med slikt! Det går med ørten tusen kroner i lærebøker, flashcards og anna skuleutstyr, i tillegg til ein og annan rygg som ikkje lenger taklar å bere rundt på eit tonn kvar dag. 

Rørslesystemet er førebels det mest interessante, for der handlar det om ting som vi kan sjå og forstå mekanismane bak (i alle fall viss vi kuttar litt i nokre kroppsdelar). Knoklar, musklar, sener og ligament har nokonlunde logiske namn, og det er lett å bruke sin eigen kropp som referanse. 

Nervesystemet, not so much. Eg klarer i alle fall ikkje å sjå på det som heilt enkelt og greitt at stimuli skal forårsake eit aksjonspotensiale som deretter skal utløyse ein respons. Det er så jækla smått, og samtidig så stort og viktig. 

Ikkje minst hadde det vore innmari greitt om dyra berre kunne vore litt likare kvarandre. Det er faktisk nok anatomiske og fysiologiske finurligheiter å bryne seg på i éin art, om vi ikkje skal vere nøydde til å lære variasjonane mellom ulike artar i tillegg. 

Jaja, eg får då utvikla *kremt* kunstnarferdigheitene mine!

Eg er eigentleg ganske nøgd. Øvst til venstre har vi skulderbladet (scapula), sett frå utsida (lateralt) og frå innsida (medialt). Nede til venstre har eg teikna overarmsknokkelen (humerus) bakanfrå (caudalt) og framanfrå (cranialt). På høgre arket ser vi lårbeinet (femur) cranialt, caudalt og lateralt på rekka oppe, og nede er eg godt i gang med dei to beina i leggen (tibia og fibula) lateralt, cranialt og caudalt. (Dette er forresten frå ein hund.)

Verri intressting, går eg ut ifrå. Ja, no veit de i alle fall sånn omtrent kva eg har å stri med. Håpar alle har ein strålande vår!

60 spørsmål

Lista fann eg hjå Linnéa, som fann den først hjå Mariell.

1. kor gamal er du om fem år?
Tjueseks og eit halvt. 

2. kven var du minst to timar rundt i dag?
Thomas og Sigvar. Vi måla fjøs og gjekk på mørkeloftet (PS: eg fann kjole)

3. kor lang er du?
160 cm.

4. kva var den forrige filmen du såg?
Den siste heile filmen var Cowboys & Aliens. Etterpå såg eg slutten av Atonement. Den var mykje finare, men tel jo ikkje sidan eg berre såg slutten. 

5. kven ringte du sist?
Thomas. Han måtte sjekke om PC-kabelen min låg att på Øvrelid. Det gjorde den. Flaks at eg hadde ein ekstra her. 

6. kven ringte deg sist?
Thomas. 

7. kva stod på den forrige sms’en du fekk?
"Velkommen:) eg e heime! Mads og e her."

8. føretrekk du å ringa eller senda sms?
Sende sms. Veldig.

9. er dine foreldre gifte eller skilte?
Dei er gifte med kvarandre på tjuefjerde året.

10. når såg du mamman din sist?
Eg fekk ein klem i dag.

11. kva farge har du på augene?

You decide.

12. når våkna du i dag?
Litt klokka seks, litt i åttetida og skikkeleg litt før ti.

13. kva er din favorittjulesang?
Eg veit ikkje. Eg driv stort sett ikkje med favorittar. Eit par songar likar eg litt ekstra, men då er det berre fordi eg synest at eg klarer å synge dei fint. 

14. kva er din favorittplass?
Oi. Rødehavet (under overflata), kva fjøs som helst (så lenge dyra har det fint der) og hytta om sommaren. Og hundre plassar til. 

Åh, herregud, eg gløymde nesten Otterdal! Berre sjå:

15. kva plass likar du minst?
Dei som fantasien min finn opp når eg har mareritt.

16. kvar trur du at du er om ti år?
Afrika hadde vore kult. Eit år som veterinær på eit anna kontinent. Kanskje med familie. Eg håpar på familie. 

17. kva skremte deg mest om natta som liten?
- Mareritt om kidnapparar som løfta jenter etter håret om kvelden og bandt dei fast bak låven bortanfor byggjefeltet, og skulle hive alle jentene i eit bur fullt av levande hummer neste morgon. Heldigvis hadde eg lommekniv i draumen, så eg skar laus alle jentene så dei kunne springe heim. Men då det berre var meg att, så var byggjefeltet vekk, og bortanfor låven var der berre ein ukjend by så eg aldri kunne kome heim att. 

- Ein dverg med spiss topplue som ikkje var dverg likevel, men kjempe. Og piggtrådgjerder.

- Å måtte stå opp for å tisse. Viss ein ikkje tissar før det har gått fem sekund, så kjem nemleg dodraugen. Men han likar ikkje å bli tissa på, så det går bra viss ein er kjapp.

- Revane som var under senga til mamma og pappa. Det gjaldt å ta skikkeleg sats, for viss ein hoppa langt ifrå senga, så kunne ein kome seg oppi utan at revane tok nakne barneføter. 

- Å liggje med ryggen ut mot rommet. Då ser ein ikkje kva som kjem. Same viss ein ligg på ryggen, for det som kjem kan kome opp gjennom madrassa òg. Ein må alltid ha ryggen mot veggen. 

18. kva fekk deg til å le hardt seinast?
Ein gong eg var på besøk hjå Sigrid og vi gløymte å leggje oss om kvelden. 

Det var òg ganske artig å få høyre at Balder hadde gått bananas i møkadungen medan eg ikkje var heime, og at svigermor måtte ta vaskejobben. Eg kom heim til ein hund med svak odør av gammal sauebæsj og -tiss. Sjarmerande!

19. kor stor er senga di?
Den i Oslo er 80 brei, men kan bli 160 viss ein dreg ut skuffa. Den som eg delar med Thomas når eg er heime er berre 120, men den er til gjengjeld kjempehøg. Og den som er verdas beste (som eg lagrar hjå mamma og dei) er 180. 

20. har du stasjonær eller bærbar datamaskin?
Eg har ein Asus-laptop med knust skjerm, ein Asus-laptop som er heilt fin, og ein Samsung Galaxy Tab.

21. søv du med eller utan klede?
Utan.

22. kor mange puter søv du med i senga?
Ei eller to. Før sov eg nesten sitjande. Då hadde eg to vanlege puter, ei Pocahontas-pute og ei som eg sjølv hadde måla ei sol på i barnehagen.

23. kor mange land har du budd i?
Eitt.

24. kvar har du budd?
Oslo, Nordfjordeid, Bergen, Trondheim, Nordfjoslo. 

25. likar du sko, sokkar eller berrføtt?
Berrføtt og ullsokkar. Sistnemnde kan gjerne vere grove og litt kløande.

26. er du sosial?
Mest nei, litt ja. 

27. kva er din favorittis?
Salt lakris (den som heiter Dream som vi har i Noreg). Og ulike friske sorbetar. 

28. kva er din favorittdessert?
Når eg er full er det visst Tiramisu. Elles veit eg ikkje. Eg et alt, nesten.

29. likar du kinamat?
Ja, men det kjem jo an på kven som lagar, som med omtrent alt anna. 

30. likar du kaffe?
Ja, eg må det. Viss ikkje seier Thomas at eg ikkje er vaksen. Men te er best. 

31. kva drikk du til frukost?

Oftast vatn og te. 

32. søv du på nokon spesiell måte?
Aktivt. 

33. kan du spela poker?
Teoretisk sett er svaret ja. Men eg har knapt prøvd. Dei få hendene eg har spelt har dessutan gjerne vore verd nokre titusen kroner, så eg sat mest og sa "æææææ!" (det var på internett, altså, så pokerfjes var ikkje påkrevd).

34. likar du å kosa?
Veldig. Men ikkje når som helst.

35. er du eit avhengighetsmenneske?
Nei.

36. kjenner du nokon med samme bursdag som deg?
Eg veit ei som bur i USA, og så hugsar eg at eg kjende ei som heitte Henriette då eg var lita. Eg var bombesikker på at vi hadde bursdag same dag, men mamma seier at det ikkje er sant. 

37. vil du ha born?
Heilt klart.

38. kan du nokon andre språk enn norsk?
Eg er ein ræsar på engelsk og svensk, dansk når eg har drukke litt. Tysk, nederlandsk, spansk, islandsk og fransk forstår eg ganske mykje av, men det å konstruere noko sjølv går ikkje så bra. Italiensk er òg på veg.

39. har du nokon gong vore i ein ambulanse?
Nei, berre nesten.

40. føretrekk du havet eller eit basseng?
Havet.

41. kva brukar du helst pengar på?
Reiser. 

42. eig du dyre smykker?
Nei. Eg har berre ein gullring, og den er så smal at den nesten ikkje synast.

43. kva er ditt favorittprogram på tv?
For tida har Thomas og eg Drømmedesign surrande i bakgrunnen i mange timar kvar sundag. TV som eg ikkje ser på TVen er Weeds, Modern Family, The River, Dag, Alcatraz, Mad Men, Boardwalk Empire, Game of Thrones og How I Met Your Mother. Og så fekk eg dilla på Monk i forgårs. Pluss at eg elskar naturprogram.

44. kan du rulla med tunga?
Ja!

45. kven er den morsommaste personen du kjenner?
Mattias.

46. søv du med kosedyr?
Nei. Berre Thomas (he-he-he). Her i Oslo er senga uansett så smal at eg såvidt klarer å snu meg når eg er åleine. Eg måtte faktisk øve på det, for eg er van med å berre velte rundt. 

47. kva har du som ringelyd?
Standardlyden til Sony Ericsson.

48. har du klesplagg frå du var liten?
Ja. Nokre favorittar er Amerikakjolen som er bitteliten, og brudepikekjolen som mormor sydde då eg var fem. 

49. kva har du nærast deg no som er raudt?
Eit par ullsokkar og Postkasse³-tskjorta mi (Thomas si).

50. flørtar du mykje?
Ja, med Thomas. Og med kyrne som eg helst vil skal stå i ro.

51. kan du bytta olje på bilen?
Ja, eg har til og med gjort det for folk som har betalt for det, på ein ordentleg verkstad.

52. har du fått ei fartsbot nokon gong?
Nei, eg har berre fått bot for å stå i ro. 

53. kva var den forrige boka du leste?
Det kan ha vore "Jo fortere jeg går, jo mindre er jeg". Kjempebra og norsk. Les den!

54. leser du avisa?
Eg les teikneseriane på Dagbladet si nettavis, og held meg helst til NRK si nettavis når eg treng noko med substans som er nokonlunde påliteleg. 

55. abonnerer du på noko magasin?
Nei, men familien min abonnerer på Illustrert Vitenskap, og svigermor på Hjemmet (eller var det Norsk Ukeblad?). Så dei får eg stort sett lest kvart nummer av, då.

56. dansar du i bilen?
Når det trengs.

57. kva for radiostasjon høyrte du på seinast?
P3. På radiodokumentaren om Ingeborg på Post 4.

58. kva var det siste du skreiv ned på eit papir?
Eg teikna på ein Post-It til Sigvar kor eg meinte at han burde plassere sofaen i stova si. Men helst ville eg at han skulle fikse seg ein annan sofa som kunne passa betre.

59. når var du i kyrkja sist?
I bryllupet til Kristian og Ingvil sist September.

60. er du lykkelig?
Av og til. 

same procedure

Tradisjonen tru er det aldri langt mellom dei tunge dagane. Dagar der det er eit ork å opne auga om morgonen, og det riv litt i hjarterota å sleppe han av garde på jobb. Ja, herregud. Ein skal då ikkje vere så avhengig av nokon, skal ein vel?

I morgon reiser eg tilbake til Oslo. Til ein ny eksamensinnspurt og friskt mot.

Her heime har eg gjort eit forsøk på å fokusere på det som er bra, og som gjer meg glad. Eg trur ikkje denne eksamenen blir min beste, men akkurat no har eg senka ambisjonane til eit nivå der eg ikkje øydelegg meg sjølv. Eg må få ha det bra sjølv om eg gjer mitt beste, og då kan eg ikkje alltid kreve å vere på toppen. Dermed er det om å gjere å kome seg ut litt. Vere i aktivitet, vere nyttig.

ti fine ting sidan sist

Ein
Balder har blitt eitt år! Og så Tilt, då. Dei feira med ein god dusj, leikeslosskamp og griseøyre.

 

 








To
Eg har starta på Fanakofte til Sigvar. Han ville ha lilla og kvitt. Bør bli bra!

Tre
Three mint frå Pukka. Vi har vore tome for mint-te altfor lenge, så endeleg. Nam.

Fire
Roser frå snille mamma. For høvet vakkert dandert i eit ølglas.

Fem
Den nye kontorkroken min! Praktisk, faktisk.

Seks

Svigermor sine handarbeidsblad frå åttitalet. Eg har fått skikkeleg, skikkeleg dilla, sjølv om det aller meste er kjempegrellt. 

Nei, no kjem eg ikkje på fleire fine ting. Det er visst feil dag for slikt. Bortsett frå Thomas, då. Thomas er kjempefin.